O Foro da Mocidade de Vigo convocaba para este 24 de abril unha folga no ensino medio de Vigo polo cumprimento do 124/2007, que é a lei que rexe o emprego do galego no ensino. Aulas baleiras e unha manifestación de máis de medio milleiro de estudantes é o resultado desta primeira mobilización local polo uso do galego no sistema educativo.
A manifestación saiu da Praza dos Cabalos e realizou un percorrido polas principais rúas do centro de Vigo, até rematar fronte á Delegación da Xunta nesta cidade, sendo escoltada por policias antidisturbios, nun ambiente festivo e combativo que centrou as reivindicacións na língua e na soberanía de Galiza.
Berros como "Na Galiza en Galego", ou "Queremos estudar en Galego", estiveron acompañadas de reclamacións de soberanía para o noso país e críticas tamén para "Galicia Bilingüe", os defensores do uso do español na Galiza.
A mobilización rematou coa lectura dun manifesto por parte dun estudante onde sinalaban que "para o Foro da Mocidade de Vigo a verdadeira normalización é camiñar cara o monolingüismo galego no ensino e na sociedade en xeral".
![BOLETÍN PCPG [25-07-2009]](https://blogger.googleusercontent.com/img/b/R29vZ2xl/AVvXsEjKJwR9capQn9RwaC1RinT135L_RooKOU-yMtyhQipxgNy12eTfPDepckLe6dgCs5XGRG2k2hEpdWR8s0EoAgthWgCWm00GalRIK1ofYb5j-8LLiDp8qxrXOYG-rV02EKcdbs1x5Q/s1600-r/portadaPCPG240.png)
