O próximo venres 31 de Maio o Colectivo Nacionalista de Marín e o Partido Comunista do Povo Galego organizamos un debate sobre a necesidade dun novo modelo de sindicalismo.
Nunha situación onde a explotación dos
traballadores e traballadoras se vai acrecentando coas medidas adoptadas
polos distintos gobernos mediante reformas laborais, incremento dos
impostos directos e indirectos, o recorte das pensións ou baixadas
salariais, faise máis necesaria que nunca unha volta aos principios do
sindicalismo.
Estamos a padecer unha crise sen
precedentes onde están fechando un gran número empresas e outras, como
Pescanova, teñen grandes posibilidades de desaparecer deixando tras de
si un grande número de desempregad@s. Os nosos sectores produtivos
tradicionais, como o agro e a pesca, e o escaso sector industrial, como o
naval, sofren unha agonía desde a entrada na Unión Europea (antes CEE).
Para saírmos desta situación é
necesario un sindicalismo que non sexa de salón e en permanente
disposición a ceder e pactar con gobernos e patronal o empeoramento das
condicións do pobo. Un sindicalismo que reaccione, mobilice, conciencie
e defenda a clase traballadora. Un sindicalismo formado por
traballadores e traballadoras, e non por profesionais do sindicato.
Para este acto contaremos coa presenza de Ricardo
Castro, Secretario Xeral da Central Unitaria de Traballadores/as (CUT),
e Francisco J.R. León, representante do Sindicato Andaluz de
Trabajadores/as (SAT) quen debaterán e falarán sobre un modelo de
sindicalismo combativo, non pactista, apegado á terra e consciente da
súa realidade nacional.
Este debate servirá para dar a coñecer,
comparar e pór en común a experiencia de dous sindicatos pertencentes a
dúas realidades nacionais distintas. Tanto a CUT en Galiza como o SAT
en Andalucía dan mostras día a día do seu carácter combativo defendendo
aos traballadores e traballadoras. O SAT loitando por unha mellor
distribución da terra, agora nas mans duns poucos propietarios, mediante
ocupacións e a CUT, a pesares de seren un sindicato pequeno é un
sindicato de referencia en conflitos laborais. [da nota de prensa enviada aos medios de comunicación]